Залуу насны дурсамж

Монголын залуучуудын байгууллага үүсч байгуулагдсаны 90 жилийн ойн баяр болж байгаа баярт энэ сайхан үйл явдлын үеэр одоогоос 50 жилийн өмнө 8-р ангид байхдаа 1961 онд хорин хэдүүлээ МХЗЭ-д элсч ХЗЭ-ийн хорооны нэгдүгээр нарийн бичгийн дарга төр нийгмийн ахмад зүтгэлтэн Д.Чимэдлхам даргаас 5 одонт гал улаан батлах хүлээн авч байсан нь саяхан боловч нэгэнт хагас зуун жил өнгөрчээ.

Дунд сургууль, Их сургууль төгсөөд төрөлх аймагтаа 1970-1972, Дархан хотод 1972-1977 онуудад хотын эвлэлийн хорооны товчооны гишүүн, байгуулагын ХЗЭ-ийн үүрийн нарийн бичгийн даргын сонгуульт ажлыг хийж олон сайхан залуучуудтай ажиллаж байсан минь улс эх орондоо чадах чинээгээрээ 37жил инженерийн ажлыг хийхэд минь их тус дэм болсон билээ.

Булган аймагт Аймгийн ХЗЭ-ийн хорооны нэгдүгээр нарийн бичгийн дарга Э.Тамжид, хоёрдугаар нарийн бичгийн дарга Ц.Гончиг эвлэлийн ажилтнуудаас Г.Нанзад, Д.Дамба, санхүүгийн ажилтан С.Дашдондог жолооч Б.Даваасүрэн, Булган хотын ХЗЭ-ийн хорооны нарийн бичгийн дарга нь Д.Цогзолмаа нар ажиллаж байсныг дурсан санаж байна. Бусад олон эвлэлийн ажилтаныг насны эрхээр мартсаныг уучлахыг хүсье.

Тэр үеийн залуучууд гал шиг цогтой золбоотой, хөдөлмөрч эх оронч, ахмад хүмүүс аав ээж, багш сурган хүмүүжүүлэгчдийнхээ сургаал үгсийг дуулгавартай сонсдог олон бүтээлч ажил хийсэн залуус байлаа.

Миний өчүүхэн хөдөлмөрийг үнэлж 1974 оны 2-р сарын 13-нд 5569 тоот МХЗЭ-ийн Төв хорооны “Хүндэт үнэмлэх”-ийг нэгдүгээр нарийн бичгийн дарга Ч.Пүрэвжаваас 1975 онд МУ-ын хөдөлмөрийн баатар нэрт захиолч , эрдэмтэн Л.Түдэв гуайгаас 125 тоот үнэмлэх бүхий МХЗЭ-ийн “Тэргүүний ажилчин залуу” алтан медаль авч их баярлаж билээ.

Хойч үе залуучууддаа үе үеийн ахмадынхаа үлдээсэн өв уламлжлал, амжилт бүтээлийг үргэлжлүүлэн нэр төртэй бүтээл арвинтай, алсын хараатай, хөгжлийн хурдтай хөл нийлүүлэн 21-р зууны ирээдүй болсон та бүхэндээ баярын мэнд  дэвшүүлэн аз жаргал сайн сайхан бүхнийг хүсье. Нийт ахмад хүмүүстээ урт удаан нас, эрүүл энхийг хүсье.

Ахмад инженер  Лхагвадорж овогтой Цогт

Аймгийн залуучуудын байгууллага үүсч хөгжсөний 90 жилийн ойд зориулсан "Залуу нас - Мөнхийн дуудлага " номонд орсон Эвлэлийн ахмад ажилчдын дурсамж ярианаас....